| ഭാഷ | ഇംഗ്ലീഷ്, തമിഴ് |
| സംവിധാനം | Vivek Elangovan |
| പരിഭാഷ | അനൂപ് പി.സി |
| ഴോൺറെ | ത്രില്ലർ |
| Rating | IMDb |
വിവേക് ഇളങ്കോവന്റെ സംവിധാനത്തിൽ പൂർണ്ണമായും അമേരിക്കൻ പശ്ചാത്തലത്തിൽ ഒരുങ്ങിയ മികച്ചൊരു ക്രൈം ത്രില്ലറാണ് ‘വെള്ളൈ പൂകൾ’. സമാന്തരമായി സഞ്ചരിക്കുന്ന രണ്ടു കഥാതന്തുക്കളിലൂടെയാണ് ഈ ചിത്രം പ്രേക്ഷകരിലേക്ക് എത്തുന്നത്.
തന്റെ സമ്മതമില്ലാതെ വിവാഹിതനായ മകനോടുള്ള കടുത്ത പിണക്കത്തിലായിരുന്നു റിട്ടയേർഡ് പോലീസ് ഉദ്യോഗസ്ഥനായ രുദ്രൻ. എന്നാൽ ഒരു സഹപ്രവർത്തകന്റെ നിർബന്ധത്തിന് വഴങ്ങി, ഒട്ടും താല്പര്യമില്ലാതെയാണെങ്കിലും അമേരിക്കയിലുള്ള മകനെയും മരുമകളെയും സന്ദർശിക്കാൻ അദ്ദേഹം തയ്യാറാകുന്നു. പതിയെ അവിടുത്തെ പുതിയ സാഹചര്യങ്ങളുമായി പൊരുത്തപ്പെടാൻ ശ്രമിക്കുന്ന രുദ്രനെ തേടിയെത്തുന്നത് തികച്ചും അപ്രതീക്ഷിതമായ ചില സംഭവവികാസങ്ങളാണ്. അയൽപക്കത്ത് നിന്നും ഒരു സ്ത്രീയും കുട്ടിയും ദുരൂഹസാഹചര്യത്തിൽ കാണാതാകുന്നു. ഇതിന് സമാന്തരമായി, ക്രൂരനായ ഒരു പിതാവിന്റെ പീഡനങ്ങൾ ഏറ്റുവാങ്ങുന്ന അമ്മയുടെയും മകളുടെയും മറ്റൊരു കഥയും ചിത്രം തുറന്നുകാട്ടുന്നുണ്ട്.
ആരാണ് ഈ തിരോധാനങ്ങൾക്ക് പിന്നിൽ? മൂന്നാമതൊരു തട്ടിക്കൊണ്ടുപോകൽ കൂടി അരങ്ങേറുന്നതോടെ കാര്യങ്ങൾ കൂടുതൽ സങ്കീർണ്ണമാകുന്നു. ഈ നിഗൂഢതയുടെ ചുരുളഴിക്കാൻ രുദ്രനും സുഹൃത്ത് ഭാരതിക്കും നേരിട്ട് മുന്നോട്ടിറങ്ങേണ്ടി വരികയാണ്. മികച്ച അവതരണശൈലികൊണ്ട് തുടക്കം മുതൽ ഒടുക്കം വരെ പ്രേക്ഷകരെ ആകാംക്ഷയുടെ മുൾമുനയിൽ നിർത്താൻ ഈ ചിത്രത്തിന് സാധിക്കുന്നുണ്ട്.
